ყველასათვის კარგად ცნობილი ფაქტია, რომ ჯანსაღი კვება წონისა და ჯანმრთელობის შენარჩუნების აუცილებელი პირობაა. არანაკლებ საინტერესოა ის ფაქტიც, რომ საკვებ რაციონს ადამიანის ხასიათსა და კეთილდღეობის შეგრძნებაზეც შეუძლია გავლენის მოხდენა. ჩატარებულმა კვლევებმა აჩვენა, რომ არაჯანსაღი საკვები, მაგ: სწრაფი კვების და შაქრის შემცველი წასახემსებელი პროდუქტები დეპრესიის, სტრესის და შფოთვის მომატებულ რისკს უკავშირდება. ის  ფსიქიკური დაავადებების (ალცჰაიმერის დაავადება, შიზოფრენია, თვითმკვლელობა) განვითარებაშიც გარკვეულ როლს თამაშობს. ამიტომ ჯანსაღი კვება არამარტო ფიზიკური, არამედ ფსიქიკური ჯანმრთელობის ძალიან მნიშვნელოვანი საფუძველია.

თეორიულად აღნიშნული ფაქტის აღიარება ადვილია, მაგრამ პრაქტიკული განხორციელება არც თუ ისე მარტივი გვეჩვენება. ჯანსაღი კვება არამხოლოდ სწორი საკვები პროდუქტების შერჩევას, არამედ დროის თვალსაზრისით კვების სწორ გადანაწილებას გულისხმობს. თუმცა თუკი საკუთარ თავს წარმატებისათვის განვაწყობთ და ცვლილებების განხორციელებას თანდათანობით და არა ერთბაშად შევუდგებით, შედეგი აბსოლიტურად მიღწევადია.

პირველ რიგში, მნიშვნელოვანია ჯანსაღი საკვები პროდუქტების ცოდნა. ეს ის პროდუქტებია, სადაც დიდი რაოდენობითაა  ორგანიზმისათვის სასარგებლო კომპონენტები: ცილა, ვიტამინები, მინერალები, ანტიოქსიდანტები და უჯრედისი - ბუნებრივი ნახშირწყლები და მცირე რაოდენობით ან საერთოდ არ არის  მავნე ნივთიერებები, მათ შორის, მარილი და რაფინირებული (დამუშავებული) შაქარი.

ცილის  დღიური რაოდენობა  ადამიანის წონაზეა დამოკიდებული და ყოველ კილოგრამზე 0.8 გრამს შეადგენს. ცილის შემცველობა მაღალია თევზეულში, ქათამსა და მჭლე ხორცში. ასევე მცენარეულ საკვებში, როგორიცაა ლობიო, თხილი და სოიო. ამიტომ დღის რაციონი მდიდარი უნდა იყოს აღნიშნული პროდუქტებით.

ვიტამინები, მინერალები და ანტიოქსიდანტები დიდი რაოდენობით შედის ხილსა და ბოსტნეულში. მუქი მწვანე ფერის ბოსტნეული (ბროკოლი, კომბოსტო) განსაკუთრებით მდიდარია კალციუმით, მაგნიუმით, რკინით, კალიუმით, თუთიითა და ვიტამინებით A,C,E და K. მინერალებიდან საკვებ რაციონში განსაკუთრებით  კალციუმია საყურადღებო, რომელიც ძვლებისა და კბილების შენებისთვის, ასევე გულის ადექვატური ფუნქციონირებისთვის არის მნიშვნელოვანი. საკვებში მისი დეფიციტის შემთხვევაში ორგანიზმი მას საკუთარი ძვლიდან იღებს და ეს უკანასკნელი იფიტება. კალციუმის დღიური დოზის მისაღებად ბოსტნეულსა და მწვანილთან ერთად აუცილებელია რძის პროდუქტების: ყველი, რძე, იოგურტი ყოველდღიურად მიღება. მნიშვნელოვანია მოერიდოთ პროდუქტებს, რომლებიც კალციუმის მარაგს ამცირებს ორგანიზმში: კოფეინი, ალკოჰოლი, შაქრიანი სასმელები.