ბავშვის განვითარების სტადიები თეორიულად ასახავს ბავშვის დაახლოებით განვითარებას ასაკთან შესაბამისობაში და ქმნის სავარაუდო წარმოდგენას, თუ რა შეიძლება იყოს „ნორმალური“ ამა თუ იმ განვითარების პერიოდისათვის. მისი შეფასება ხდება რამდენიმე მიმართულებით: მოტორიკა ანუ მოძრაობის განვითარება, მეტყველება, მხედველობა, სმენა და სოციალური მხარე.

12–24 თვეები

ფიზიკური

• დაბადებისას არსებული წონა დაახლოებით გასამმაგებულია.
• სუნთქვის სიხშირე იცვლება აქტიურობისა და ემოციების მიხედვით.
• ზრდის სიჩქარე იკლებს.
• თავის ზრდის სიჩქარე იკლბეს; წინა ყიფლიბანდი დახურულია დაახლოებით მე-18 თვისათვის.
• გულ-მკერდის გარშემოწერილობა აღემატება თავისას.
• ფეხები შესაძლოა კვლავ მოღუნული იყოს.
• ცხიმის რაოდენობა იკლებს სიარულს დაწყებასთან ერთად.
• სხეულის ფორმა იცვლება და ემსგავსება უფრო დიდისას.

მოტორული განვითარება

• დგას მარტო, დახმარების გარეშე, ხელებს იწვდის დახმარების მოლოდინში.
• წამოდგომას ახერხებს დახმარების გარეშე.
• ბავშვების უმეტესობა დადის დახმარების გარეშე ამ პერიოდის ბოლოსთვის.
• იყენებს ავეჯს დასახრელად, დავარდნისას უკან ვარდება ან წინ ხელებზე ვარდება და მერე ჯდება.
• განმეორებითად იღებს და ისვრის საგნებსა და სათამაშოებს.
• ცდილობს სირბილს, უჭირს გაჩერება და როგორც წესი უბრალოდ ვარდება.
• მიხოხავს კიბეზე როგორც ზემოთ, ისე ქვემოთ.
• ზის პატარა სკამში.
• გადააქვს სათამაშოები ერთი ადგილიდან მეორეში.
• მოსწონს ფანქრებითა და ფლომასტერებით ხატვა.
• ეხმარება კვებისას, სვამს თავად ჭიქიდან, არაა ყოველთვის ზუსტი ქმედებები პირთან მიტანისას
• ფურცლავს წიგნებს.

კოგნიტიური განვითარება

• მოსწონს საგნების დამალვა.
• იწვდის სათამაშოს, თუკი მეორეს შესთავაზებენ.
• აწყობს სათამაშოებს იატაკზე.
• პირში საგნებს ნაკლებად იდებს.
• მოსწონს ნახატებიანი წიგნების დათვალიერება.
• აჩვენებს ან აწვდის სხვა ადამიანს სათამაშოს, რათა მან ნახოს იგი.
• ასახელებს ბევრ ყოველდღიურ საგანს.
• გამოხატავს სივრცობრივი აღქმის უკეთეს განვითარებას.
• ცდილობს გაიმეოროს სხვების მიერ შერულებული ქმედებები.
• ცდილობს მიმიკებით გამოხატოს ემოციები, თუმცა არც ისე წარმატებით.
• აუტიზმის დიაგნოზი ძირითადად ამ ასაკში ვლინდება.

სოციალური

• ნაკლებად ღიზიანდება უცხოებზე.
• ეხმარება სათამაშოების აღებაში და დალაგებაში.
• თამაშობს მარტო
• მოსწონს როდესაც უჭირავთ ხელში და უკითახვენ.
• ხშირად იმეორებს უფროსების ქმედებებს თამაშისას.
• მოსწონს უფროსების ყურადღება და იმის გაცნობიერება, რომ ვიღაც მუდმივადაა მის გვერდით, კოცნის და ეხუტება.
• ცნობს თავის თავს სარკეში.
• მოსწონს სხვა ბავშვების სიახლოვე, მაგრამ არ თამაშობს მათთან ერთად.