დამწვრობა
დამწვრობა
allmedic
დამწვრობა
დამწვრობა

დამწვრობა საყოფაცხოვრებო პირობებში ან სამუშაო ტრავმის შედეგად მიღებული სხეულის დაზიანებაა, რომელიც შეიძლება გამოიწვიოს:

  • ცეცხლმა, ცხელმა საგნებმა, სითხემ ან ორთქლმა (თერმული დამწვრობა).
  • დენმა (ელექტრული დამწვრობა).
  • საყოფაცხოვრებო თუ სხვა დანიშნულების ქიმიურმა ნივთიერებებმა (ქიმიური დამწვრობა)
  • მზემ, სოლარიუმმა, რადიაციულმა თერაპიამ ან რენტგენის სხივებმა (რადიაციული დამწვრობა).

იმის მიხედვით თუ რამდენად ღრმაა დაზიანება არსებობს დამწვრობის ოთხი ხარისხი:

  • პირველი ხარისხი - მოიცავს კანის მხოლოდ ზედა შრეს (ეპიდერმისს). მისთვის დამახასიათებელია სიწითლე და ტკივილი, რომელიც  პირველადი დახმარების გაწევიდან რამდენიმე დღეში გაივლის (კლასიკური მაგალითია მზით დამწვრობა).
  • მეორე ხარისხი - მოიცავს ეპიდერმისს და მის ქვედა შრეს (დერმა), ხასიათდება სიწითლით, ტკივილითა და შეშუპებით. შეიძლება ჩამოყალიბდეს ბუშტუკი და დატოვოს ნაწიბური.
  • მესამე ხარისხი - მოიცავს მთლიან კანს და დერმის ქვეშ მდებარე ცხიმოვან შრეს, შესაძლოა დაზიანდეს ნერვები.
  • მეოთხე ხარისხი - კანთან ერთად აზიანებს მის ქვეშ მდებარე კუნთებს და ძვლებს. ის დამწვრობის ყველაზე მძიმე ფორმაა.

 

პირველი ხარისხის და მეორე ხარისხის მსუბუქი ფორმის დროს მკურნალობა სახლის პირობებშიცაა შესაძლებელი და გულისხმობს შემდეგ საფეხურებს:

  • დამწვარი ადგილის გაგრილება ოთახის ტემპერატურის წყლით 15-30 წუთის     განმავლობაში. არ გამოიყენოთ ყინული ან ყინულიანი წყალი, კარაქი, ზეთი და სხვა მსგავსი, ამან შეიძლება უფრო გააღრმავოს დააზიანების კერა.
  • ჭრილობა მობანეთ საპნით, ფაქიზად მოაცილეთ უცხო სხეული, ისე რომ არ გახეთქოთ ბუშტუკები ან უფრო მეტად არ დააზიანოთ კანი.
  • წაუსვით გარეგანი მოქმედების ადგილობრივი საანესთეზიო საშუალება.
  • დამწვარ ადგილს დააფარეთ სტერილური საფენი ფაქიზად, ზეწოლის გარეშე, რათა შემცირდეს ინფექციის შეჭრის რისკი.
  • თუ ტკივილის ატანა გიჭირთ დალიეთ ტკივილგამაყუჩებელი საშუალება.

 

 უფრო მაღალი ხარისხის დაზიანება აუცილებლად მოითხოვს სპეციალისტის ჩართვას და მისი მეთვალყურეობის ქვეშ მკურნალობას. 

allmedic