მრავლობითი სკლეროზი არის დაავადება, რომლის დროსაც ადამიანის საკუთარი იმუნური სისტემა თავს ესხმის ნერვების დამცავ გარსს - მიელინს, რის შედეგადაც ფერხდება/წყდება თავისა და ზურგის ტვინში ნერვული იმპულსების გადაცემა.

დაავადების გამომწვევი ზუსტი მიზეზი დადგენილი არ არის, მაგრამ ვარაუდობენ, რომ ეს არის აუტოიმუნური ხასიათის პროცესი.

მრავლობითი სკლეროზის სიმპტომატიკა დამოკიდებულია ნერვის დაზიანებული უბნის ადგილმდებარეობაზე და შეიძლება ვლინდებოდეს:

• დაბუჟების და სისუსტის შეგრძნებით ერთ ან რამდენიმე კიდურში, სხეულის ერთ რომელიმე მხარეს
• მხედველობის ნაწილობრივი ან სრული დაკარგვა, როგორც წესი ერთ თვალში
• მხედველობის გაორება ან მისი დაბინდვა
• ჩხვლეტისა და ტკივილის შეგრძნება სხეულის სხვადასხვა ნაწილებში
• ელექტრული იმპულსების შეგრძნება კისრის გარკვეული მოძრაობებისას
• კანკალი, კოორდინაციის დარღვევა
• მეტყველების დარღვევა
• დაღლილობა
• თავბრუსხვევა
• კუჭისა და შარდის ბუშტის მოქმედებასთან დაკავშირებული პრობლემები

დიაგნოზის დასმისათვის არ გამოიყენება კვლევის სპეციფიური მეთოდები. დიაგნოსტირება ემყარება დაავადებისათვის დამახასიათებელი სიმპტომატიკის გამოვლენას. დამატებითი კვლევის მეთოდებია მაგნიტორეზონანსული ტომოგრაფია და თავზურგტვინის სითხის ანალიზი.

მრავლობითი სკლეროზის მკურნალობა გულისხმობს სიმპტომურ თერაპიას და დაავადების პროგრესირების შენელებას.  

შეტევების სამკურნალოდ გამოიყენება სტეროიდები და პლაზმაფერეზი.